民建聯主席李慧琼噚日接受白鴿黨前主席劉慧卿網台訪問，見到卿姐呢位佛山鄉里，琼子即時重提自己5月時同訪港嘅全國人大常委會委員長張德江為民主派爭取回鄉證，又問卿姐申請咗回鄉證未，話自己同成班鄉里等緊卿姐返鄉下。
卿姐聽到反應麻麻，話遲啲先啦，同琼子笑稱：「我申請會搵你！」卿姐話其實唔少人都係佛山鄉里，包括已宣佈參選特首嘅新民黨葉劉、官司纏身嘅前特首曾蔭權同立法會主席梁君彥。
卿姐又話，5月見張德江時講嘅三大願望，其中兩項未到新年已實現咗，包括梁振英唔連任同獲發回鄉證，希望剩低落實真普選一項可以快啲實現埋啦！