立法會前主席、民建聯曾鈺成噚日出席母校聖保羅書院嘅論壇，同場仲有唔少校友，包括時事評論員蕭若元。曾鈺成其後喺facebook發文指「今日同燈神同場」，又上載多張合照，燒山搭住曾鈺成膊頭，曾鈺成笑騎騎，兩個人老友鬼鬼咁，而且曾鈺成仲hashtag#明燈指引同#燒山好嘢。
笑稱正構思特首政綱
網民就變身花生友，紛紛留言問曾鈺成「燈神有冇祝曾生你選到特首」、連中出羊子都留言問佢「（蕭生）有冇祝福你選唔到特首」，又笑主席好鬼馬、跟得好貼。唔知係咪見到網民熱烈留言，曾鈺成喺hashtag中再加上#無祝福我，積極同網民互動。
曾鈺成喺論壇中就笑笑口話構思緊特首候選人嘅參選政綱，笑稱唔急住宣佈參選，最後宣佈先着數喎。對於有人話要考慮特首參選人政綱先決定支持邊個，佢笑稱唔相信呢個講法，話邊個會睇吖。論壇後佢被追問寫政綱時就話，佢成立嘅智庫「香港願景」，目標之一就係寫政綱，希望特首候選人採納，指𠵱家話係咪參選言之過早，上屆佢都係提名期截止前幾日先宣佈唔選。