新民黨主席葉劉淑儀早前宣佈參選特首，喺電台接受訪問時一度引述會計師公會秘書處回覆，話唔識會計界新當選嘅年輕選委，言語間暗示選出嚟嘅唔係精英，結果未入閘先辣㷫唔少會計界選委，有團體更發聲明炮轟葉劉。
打正ABC旗號、成功當選會計界選委嘅龔耀輝，早前話明會追問公會秘書處，希望知道當日葉劉點問公會、公會又點答？最終公會噚日發稿澄清，話冇收過任何特首候選人嘅查詢，故亦冇作出有關回覆，強調公會鼓勵會員參與公共事務，但作為專業組織，對公共選舉事宜一向恪守政治中立原則。
龔耀輝噚日喺facebook質疑葉劉根本冇查詢過會計師公會秘書處，同喺電台所講有出入。八方噚日試過搵葉劉回應事件，但截稿前未獲回覆。