上一期講到，中國金融體系將爛賬、假賬攬晒上身，變成一條殭屍，神仙難救。回想起2008年金融海嘯，當年中國正值高增長嘅黃金時代，百毒不侵，反而美國金融問題來得比中國更早，當時美國選擇將一間殺傷力較細嘅雷曼引爆，雖然搞到雞毛鴨血，結果卻換來投資銀行加強監管，同埋有藉口印十個煲蓋嘅銀紙出嚟、冚返住十個煲嘅連環QE，八年後已經由不可能正常變返一切正常。
至於中國？金融海嘯後，危機屢次出現，次次一樣選擇碌卡找數，但過後就當冇事，繼續宣示共產黨政權穩如泰山，唔願意認衰仔把握機會去改善制度，市場冇經歷教訓，自然變本加厲，鑊鑊出事但求中央打救，八年間乜人都由正常變到唔正常。
點解美國反應快，每步棋行得精妙？人家玩金融高你幾班，加上美國以市場主導，危機要快速解決，否則選票都輸埋，政權拱手相讓。假如美國學似中國咁，次次碌卡冚數，卡數越滾越大，相信美國爆煲得比中國更快，邊度得嚟美股今日嘅風光，道指兩萬點就在眼前，直逼以中國做靠山嘅香港恒生指數。
中國金融問題越玩越大，今次連國債都出事，結局無驚喜，又係中央擺平，呢種玩法去到最後，內地樓市泡沫一旦爆破，中央更大規模印鈔買入大批內銀股權，產生攤薄效應，到時市場只會變得更多殭屍，迷失多十年。
點解美國人最終投票比特朗普？連商界都支持特朗普上場？正正因為人家今時今日已經唔怕得罪你強國人，睇吓中國金融系統病到死吓死吓，唔旨意靠你搵到食，都唔想黐咁埋感染你啲金融問題，去一體化咪去一體化。
唔怕中美關係惡化？真係搏鎚，美國佬一拳就KO你，你以為真係強國？人家當你老鼠而已，唔笑你當畀咗面你。
晉佳
http://fb.com/advanceguy1