基斯坦奴朗拿度（C朗）嘅商業王國越做越大，繼賣底褲同開酒店之後，家陣諗住搞埋健身中心，名都已經改好叫做「CR7 Clubs」。我求大俠諗起10年前有套賓史迪拿主演嘅笑片叫《屎波快閃隊》，戲入面賓史迪拿做嘅「鋪鋪堅」健身中心老闆相當搞笑，同客人打成一片，唔知C朗第日會唔會同客人一齊做gym，甚至好似鋪鋪堅咁收購對手呢嘅健身中心？
體驗C朗嘅器材
31歲嘅C朗日前發聲明，佢同美國健身集團Crunch合作，會喺西班牙搞連鎖式健身中心。最大賣點係，客人可以用C朗平時用開嘅器材，體驗吓呢位葡萄牙球星平時係幾咁刻苦訓練。C朗話：「我哋會提供健身同埋健康諮詢服務，價錢合理，所有會員都可以用我用開嘅器材。」英國傳媒話，如果CR7 Clubs喺西班牙搞得成功嘅話，就會向全球擴展，第日話唔定喺香港開分店。
占士搞簽證去英超
我求大俠覺得C朗幾適合搞健身中心，因為佢就係最佳人辦。C朗初出道嗰陣成支竹咁，風大啲都驚吹走佢，但經過努力健身後，C朗變咗鋼條人咁，成身肌肉，之後就同美斯一齊雄霸球壇。有西班牙傳媒話，C朗將會贏得下月頒獎嘅世界足球先生，但就冇金球獎拋離得咁多，不過國際足協就澄清仲未知結果喎。
當C朗忙住發展盤生意時，加里夫巴利就搭私人飛機返英國度假兼養傷，至於占士洛迪古斯就忙住搵新工。皇馬嘅轉會禁令縮減至一個轉會窗，淨係明年初冇得買人；既然出年夏天已經可以買番人，咁自然可以放心放走啲冷板兵。哥倫比亞中場占士洛迪古斯都知自己喺皇馬嘅日子就到盡頭，所以日前返到家鄉波哥大嘅英國領事館搞簽證，睇嚟好有機會去英超搵食。根據skyBET嘅賠率，占士洛迪古斯最熱門嘅新東家係車路士，有2.25倍，至於次熱就係八倍嘅曼聯。