公民黨陳淑莊Tanya冬至轉look，以前有名大家叫嘅「四眼陳」重現眼前，短髮嘅四眼陳令大家有啲新鮮感。東華三院近日向城規會申請將文武廟旁邊一間舊校舍重建為一幢21層高嘅青年宿舍，Tanya同中西區及城西關注組等都反對，早前仲到文武廟外發起聯署活動，噚日做冬前就向城規會遞交逾500個簽名。
Tanya解釋反對原因，話文武廟係其中一座殖民時期最早興建嘅中式廟宇，2010年列為法定古蹟，必須謹慎保育，而樓高21層嘅青年宿舍唔只喺高度、面積同設計上同文武廟唔一致，文武廟嘅建築同文物價值都可能會因為旁邊唔適當重建而受破壞，影響埋建築物結構同環境，覺得地段唔適宜發展青年宿舍項目。