〔話說天下大勢，分久必合、合久必分。〕
〔80年代尾，卡啦OK由東瀛入侵香港中原，BIG ECHO喺1990年開啟咗香港卡啦OK嘅戰國時代~~之後短短幾年間，已經超過10家卡啦OK出現，形成咗群雄割據嘅局面……〕
〔當中兩大諸侯：加州紅同NEWAY乘勢崛起，加州紅仲憑住軍師嘅連環計…將中原嘅卡啦OK勢力殺個片甲不留！各路諸候BIG ECHO、TOP ONE、前衛、NICAM、嘉禾、創藝、活力同NEWAY成立咗大聯盟對付加州紅……〕
湯記湯寶如好記得90年代初，喺電視成日睇到飛圖唱片公司買嘅廣告時段：「以前我記得第一代嘅時候係飛圖年代，梁雁翎一定係卡拉OK嘅代表人物。飛圖係有嗰啲melody guide guide住你唱，你會覺得好核突。跟住到我哋寶麗金出「碟聖」，嗰個時候好犀利，原裝original音樂，咁你會覺得…嘩！好聽喎！仲有埋學友、Shirley、阿恩個樣。嗰陣時我哋踩24小時拍兩隻歌㗎。」
自認係「資深K迷」嘅蔡立兒，佢就唔太 like當年推出嘅「獨家試唱」喇：「我哋嗰陣早期咩歌都可以唱到㗎嘛，咁變咗有獨家試唱嘅話，我哋要走3、4場先唱得晒啲歌囉。」
而卡拉OK box盛勢嘅時候「大聯盟」嘅出現，對於當年任職加州紅卡拉OK box 市場推廣總監嘅Raymond嚟講，原來冇乜大影響，佢話：「點解有大聯盟出現，就係因為想籌夠一嚿錢買多啲歌做獨家試唱同我哋抗衡嘛！不過，我哋已經同唱片公司關係良好，又有完善宣傳策略，加上佢哋係9間唔同卡拉OK，宣傳、各項策略同服務一定有參差，嗰個聯盟唔可以一時三刻學習到我哋。」
高峰時期大大細細嘅卡拉OK box有成200間咁多，成個行業嘅營業額高達17億港元，直到近年行業嘅低沉期，Raymond覺得唔係單一事件造成：「沙士、禁煙、歌權等等，仲有人嘅生活習慣轉變，internet嘅興起都有關。」
〔去到2010年，國力漸弱嘅加州紅俾NEWAY收購，RED MR喺同年崛起，而今年BIG ECHO亦決心復國，新一代嘅三國演義亦已悄悄揭開序幕！究竟K界演義可以千秋萬世，定係三國盡歸唱K神器？唱K演義30年仲有咩野史佚聞？咁就有待下回分解喇！〕
採訪：懷鈺、Roy、Cathy
拍攝：峰、Neo
場地：CEO NEWAY、hmv Flagship Store