香港人近年越來越鍾意踩單車，一部單車隨時過萬大元，發展商當然唔放過呢個商機，於新樓盤設置型仔到痺嘅單車泊位出租，搵多筆。
好似嘉華（173）剛入伙嘅將軍澳嘉悅，管理費每呎3.95元，會所樓高三層，除一般泳池、健身室、籃球場等近年新盤會所嘅標準設施，仲整埋至潮單車泊位。
但泊位相當珍貴，僅得14個，全個屋苑372伙，即係話26伙爭1個泊位，激烈過爭名校，仲要唔係免費，租金幾多就未公佈。
毗鄰新盤信置（083）帝景灣亦有單車泊位提供畀住戶租用，呢款泊位仲型，包到實，打風落雨都唔驚。
其實呢個將軍澳填海區，除咗樓之外，政府亦了解將軍澳之友喜愛踩單車，新加咗唔少免費單車泊位場，雖然標明停泊不可超過24小時及隨時收回，但基本上未滿任泊，相信發展商係吼準一堆極愛單車又捨得交租嘅住客。