卡拉OK由80年代尾、90年代初，去到高峰時期，直至今時今日，相信大家都留過唔少腳毛、擁有唔少回憶，對於歌手蔡立兒、湯寶如同「唔唱K」吳卓羲一樣有好多唔同印記……
「K迷」之一嘅蔡立兒最高峰一個禮拜去四、五日，佢話：「K腳有好多，Big Four(張衛健、許志安、蘇永康及梁漢文)、Eason(陳奕迅)等等，佢哋唔會爭咪，亦都唔會唱番自己歌，我哋都會有時會醉酒囉，喺Karaoke點會唔醉吖，係咪？！」
湯寶如就覺得近10年唔同以前，因為以前成日都有K局。想當年，佢就話冇邊隻飲歌，皆因乜都唱好濫，淨係唔唱自己歌。湯記話：「我好感激卡拉OK，有呢件事發生而令到我嘅事業非常之高漲。《相思風雨中》都係因為我同張學友而畀人熟悉，我嗰陣時啱啱新人嚟啫嘛，因為就拍咗呢個MTV，變咗多人唱，跟住流傳到依家。我都靠佢(卡拉OK)而攞新人獎㗎！最開心就係《Marlboro Red Hot Hits》系列，有《Wou bom ba》、《鼓舞飛揚》。」
「唔唱K」吳卓羲就話細細個同家姐喺屋企唱K，仲會唱1985年嘅國語金曲、劉家昌同尤雅嘅《在雨中》，佢話一有時間都會去唱K，佢話：「K腳都係林峯啦，我哋好少唱自己歌，不過佢有時都會逼我聽佢唱自己歌。」佢又話唱K一為娛樂、二為練歌，唱親都鍾意唱陳奕迅嘅歌，尤其《單車》，甚至以前初出道去試音都係唱呢首。
而喺卡拉OK box高峰期開始任職加州紅市場推廣總監嘅Raymond，就因為當時公司經常搞歌手活動，繼而同好多歌手成為朋友、成為K腳，佢話：「譬如陳奕迅嚟，冇人會知陳奕迅嚟，我哋有啲暗號嘅……陳奕迅我哋用……楊千嬅用……佢哋得閒一個星期有嚟兩次。」唔單只咁，Raymond透露原來皇室堡分店係藝人最聚腳嘅地方，每間分店仲有特別嘅稱號。
想知更多卡拉OK「秘史佚聞」，即刻去片！
採訪：懷鈺、Roy、Cathy
拍攝：峰、Neo
場地：CEO NEWAY、hmv Flagship Store