又到聖誕，又到聖誕，佳節臨近，好多地方都有人報佳音，今日中午，中環長江中心地下亦有60人報佳音，仲吸引長和（001）主席李嘉誠在場觀賞半粒鐘，見佢精神相當唔錯。
長和員工與長江中心租戶都有參與報佳音，舊年佢哋都有同樣活動，超人亦有到場㗎。超人聽到合唱團唱「You Raise Me Up」，就寄語「無論山多高，海多深，堅抱信念，終可超越界限」，並祝願大家聖誕快樂，平安愉悅！
此時此刻，超人呢番鼓勵說話，可能最啱鬍鬚曾聽，事關佢辭職多日都未獲中央批准，未能夠展開選舉工程，香港人都等到好着急，希望鬍鬚曾可以好似佢早前喺網誌所講「只要有你們繼續與我同行，又何懼前路新挑戰」，真能夠堅抱信念喇。