專業議政一眾議員噚日趁冬至約記者開party過節。𠵱家佢哋有7個民主派專業界別議員，佢哋話呢種合作模式幾好，冇諗過組黨；會計界梁繼昌笑言有游說醫學界陳沛然加入，但一如結婚，唔可以夾硬嚟。
建築、測量、規劃及園境界姚松炎早前躺着也中槍，俾政務司司長林鄭月娥話佢極難合作。姚松炎笑言根本冇同林鄭合作過，早前出席酒會時主動挑機就此問林鄭，引述林鄭話覺得呢事件唔值得關注，仲話平時都有唔少人咁樣形容自己喎。
姚松炎攻破咗梁營倉票，一上任就俾政府司法覆核議員資格，原來佢之前去信立法會主席梁君彥同立法會秘書處，認為喺梁君彥監誓下已經宣誓為議員，如果政府提覆核，冇理由梁君彥同秘書長陳維安嘅律師費由公帑畀、佢哋4個議員就要自掏荷包，但呢封信石沉大海冇回音。