男裝股利邦（891）終於飛甩「飛甩雞毛（Salvatore Ferragamo ）」啦！利邦噚日公佈，賣返同Salvatore Ferragamo搞的合營公司兩成股權畀對方，一筆過1,610萬美金（約1.25億港元）搞掂，以後唔再揸住「飛甩雞毛」！
查實「飛甩雞毛」呢個高檔Brand，本來好多香港人都唔識㗎，係多得16年前大台經典劇集《男親女愛》裏面，做Miss Mo嘅鄭裕玲（Do姐）狂提先多人識。
而利邦就喺2010年同「飛甩雞毛」呢個高檔Brand搞合營，想喺印尼、南韓、馬來西亞、新加坡同泰國做零售及批發業務，但其實對方一直想自己做多啲亞太區，同利邦做咗兩年左右到合約差唔多到期，臨近約滿利邦仲要以2億銀賣返三成股權畀對方，搞到得返兩成，叫做維持雙方關係。
但只揸「飛甩雞毛」兩成，對於利邦嚟講真係好雞肋，就算個品牌幾出名，賺到分畀公司都極有限啦！更何況四個發展分部只得南韓、馬來西亞稅後有錢賺，而且通告仲無講明以後雙方仲有無合作或其他可能，沽貨可能真正兩不相欠都唔奇。
不過利邦都好來好去，話自己係想做大中華、新加坡及歐洲的男裝零售、批發業務，同自家擁有品牌授權業務，所以先賣股份，仲有微利1,630萬港元落袋，用嚟做一般營運資金同未來收購擴張。