樂視資金鏈搞到一鑊粥，佢哋就俾人笑要靠投資嘅合拍片《長城》票房救命，但市場一面倒話呢套係大爛片，但唔知新華社係咪收到國家有任務，唔可以唱衰「中國製造」，竟然轉載咗一篇影評，叫影評人唔好刻意踩《長城》呀，擺明曲線支持樂視。
篇文話雖然《長城》三日就已經收5億銀人仔，但有口碑危機，更有人話導演「張藝謀已死」，係網上電影平台仲好多人畀得一粒星，平均分得5.4分咁話，但實際只係受「沉默的螺旋（Spiral of silence）」影響，大家未必覺得套片差，但怯於輿論就唔敢讚好，仲有啲影評人要站在高地，可能連戲都無睇就踩啦，話《長城》都值返7至8分㖭。
事實上，《長城》套片唔係無noise㗎，事關呢期傳出套戲的女一，即係京城四美之一的景甜嘅爹哋係中宣部副部長景俊海，仲話雖然佢捧極唔紅都有人出力，就係爹哋出手支持啦。雖然之後有網民搞清楚，景俊海並唔係佢亞爸，景甜爹哋只係普通人一個，但都免費宣傳咗啦。
加上套戲卡士咁勁，又有華神劉德華，麥迪文、在大國好受歡迎嘅鹿晗等等，都仲撐唔起就咪賴地硬啦。呢種強國概念，華華只諗一個人，就係「做得太好」，引到背後有一大班人要反佢嘅特首啦，一模一樣呀！