新界鄉議局要照顧幾十萬原居民權益，開支唔會細，雖然佢哋已經搵方法開源，例如沙田石門鄉議局大樓內嘅地方出租畀人搞活動，但始終唔夠，最終搞埋飲食，都可謂一大妙計！
鄉議局執委會今日召開每月例會，好一段時間冇去過大樓嘅八方到場後見到人山人海，原來係某知名西餅店租咗佢哋嘅大劇院開分店經理大會，果然善用資源。
唔單止咁，八方仲見到一間房間外，放咗大大個牌寫住「午市套餐、晚飯小菜、預定私房……歡迎各界人仕（士）光臨」，而呢間「鄉港茶館」嘅營業時間係朝11晚10，原來業務咁鬼多元化，由出租場地到餐飲都有埋。
八方睇過午市菜單，中西飯意粉總共8款咁多，盛惠40蚊算中價。雖然有鄉紳私下嫌麻麻哋，但口味嘅嘢好主觀嘅，大家路過的話不妨試試。