禮拜一場默西賽德打吡相當有火藥味,愛華頓嘅巴克里出「收山腳」踢利物浦隊長佐敦軒達臣,搞到雙方球員差啲開拖;利物浦就靠沙迪奧文尼補時四分鐘入波,作客以1:0絕殺「拖肥糖」,主場球迷掟煙花入球場,搞到烽煙四起,好似拍緊戰爭片咁。雖然場波火藥味濃,但當事人軒仔好有大將之風,話球場事球場了,已經原諒咗巴克里。
球證網開一面只罰黃牌
默西賽德打吡向來都踢到飛砂走石,呢場都唔例外。喺68分鐘,巴克里落地飛鏟軒仔,出腳遲咗又唔收,右腳鞋底踢中軒仔腳眼,搞到呢位紅軍隊長慘痛倒地。巴克里都算逃過一劫,出收山腳都係被罰黃牌,不過最好彩嘅應該係軒仔,食咗呢腳都冇大礙,可以繼續踢。
賽後記者追問軒仔,軒仔好大方咁話巴克里只係無心之失,「巴克里出腳係遲咗,我好清楚佢份人,佢係個好人,同埋我哋係好朋友。我認為佢只係純粹出腳遲咗,同埋完場後佢都主動同我道歉。喺打吡戰出現呢啲事係好正常,大家都付出百分百去爭取勝利。」領隊高路普就話:「巴克里好運,軒仔更加好彩,冇更嚴重嘅事發生。」呢次粗野攔截仲令雙方球員衝突,好在球證甸恩及時控制得住,畀咗張黃牌愛華頓嘅史密斯高文。賽後愛華頓領隊朗奴高文都冇護短,話巴克里唔抵幫,但佢話利記中堅洛夫雲喺衝突中都好激動,唔明球證點解只係罰佢啲人。
文尼補時絕殺拖肥
話呢場波有火藥味,唔單止係講氣氛,而真係有陣味!喺補時四分鐘,利物浦嘅史杜列治遠射中柱,文尼快一步執雞射入,幫紅軍絕殺愛華頓贏1:0。愛華頓門將史基倫保喺64分鐘傷出,後備入替嘅祖爾盧保斯就係慢咗文尼一步,令到主隊喺補時全失三分。球迷之後掟煙花入場,搞到個場煙霧彌漫,好似北京啲霧霾咁樣。
高路普賽後大讚傷癒復出嘅史杜列治有級數,係紅軍贏波嘅關鍵,「當你有個好似史杜列治咁好嘅球員坐喺後備席,你會成日諗幾時派佢上陣。今場好難踢,雙方形勢緊湊,史杜列治入場後幫咗我哋好多。」我求大俠都認同史杜列治有質素,但問題係佢實在太玻璃,話唔定過多兩場又長唞。利物浦贏波後以37分升上第二位,落後榜首車路士六分。