三個女人一個墟，咁三個男人呢？楊岳橋、朱凱廸同羅冠聰近日首度搞聯播，嚟自唔同黨派卻傾得投契，齊齊拆解連串政治風波，兼展望嚟緊立法會有乜搞作。
三男中羅冠聰最細，卻身兼三職無時停，除咗履行議員職責、做好學生本份交功課，同時亦要做社會服務令。岳少都好懷疑佢係點樣分身處理？聰聰聽完似乎搵到知音人，佢話真係好疲倦，返工返學之餘，每星期仲有一日做服務令，啱啱先喺個盲人圖書館擔擔抬抬，有啲體力勞動，但次次工作性質都有啲唔同，有時係收書或上架。
聽到呢度，岳少突然問聰聰啲功課點算？嘩，乜咁掃興㗎，聰聰即時笑笑口咁回應：「功課呢啲嘢唔好講！」唔知係咪講漏咗個「住」字呢？朱凱廸就大讚聰聰好犀利，身兼三職但議會工作仍然落力，除咗口頭同書面質詢都有份，發言次數亦好多，聰聰就話係歸功於議辦同事好幫忙。