年尾流流，最近都仲有唔少投行裁員劏人好陰公。但百年老店利豐榮譽主席馮國經嘅大女馮詠儀，佢位賓架老公林詩棋喺花旗就越撈越掂，最近仲紥職㖭！
噚日花旗集團就宣佈，委任林詩棋做私人銀行、企業及投資銀行亞太區業務發展主管，仲兼任埋企業及投資銀行香港首席營運官，認真厲害。
查實林詩棋本身底子厚，話晒係恒生銀行創辦人之一林炳炎嘅孫仔，做銀行做得出色都好正路，加埋百年老店利豐駙馬個朵就更響。
聽講林詩棋會進一步發力發展私人銀行、企業及投資銀行在亞太區的緊密伙伴關係，仲會向花旗企業及投資銀行亞太區主管馬禮達（Mark Slaughter）同私人銀行亞太區行政總裁Bassam Salem滙報，真係身居要職，恭喜晒！