聖誕就到，全城越嚟越紅，估唔到商務及經濟發展局局長蘇錦樑Greg都要紅到腳趾尾應節。佢日前出席香港工業專業評審局嘅第九屆執委會就職典禮暨榮譽院士及資歷院士聯歡晚宴，打煲呔着西裝嘅佢竟然紅襪登場，最離奇嘅係，唔少賓客同院士都同樣着咗紅襪，好有隊型咁舉腳同慶。
原來Greg So近期喺多個場合都用紅襪為例，宣揚創意同潮流。佢覺得着紅襪可以係一個fashion statement，不時同工業界講香港一定做到trend-setter，最重要係用實例表達。活動主辦單位知道佢呢番諗法，專登買咗堆紅襪畀嘉賓，畀佢哋同Greg So一齊着，Greg So感謝大會響應，話「集體示範充份發揮了我們工業家的敢創精神」。法國財政和公共賬目部部長薩潘年初同梁特會面時都着紅襪，莫非Greg So喺佢身上攞到靈感？