韋達開始停賽7期，流失座騎是常識吧；只係流失的是嫡系座騎，他難免感到肉赤。
繼失去香港盃亞軍「天才」後，韋達連同系的「狀元才」亦宣告冇埋，今朝(20日)雷神莫雷拉到場，除了試閘外，就只獨操「狀元才」，在大圈跳兩段，亦是他首次沾手此駒。
葉楚航馬房的「狀元才」上季在韋達胯下跑三班1400米大勝4馬位，公認潛質驚人，但之後韋達屢騎未勝，最叻只今季谷草1200米得亞軍，加上早前「天才」換人有良好效果，韋達又停賽7期，難免令幕後決心換上更佳人選。雷神繼「巴基之星」後，又有匹新實力座騎，堪稱強者越強，稍後「狀元才」報名上陣配雷神，當然值得加倍重視。