除咗出席大型酒會及到法庭出席聆訊外，極少公開蒲頭嘅前特首煲呔曾蔭權，原來早前同訪港嘅前港督肥彭以及一班前行政局舊同事，包括前政務司司長陳方安生、李國能、張健利、錢果豐、施祖祥等喺上海總會食飯敍舊，成班舊電池一齊話當年。
陳太慰煲呔：佢壓力大
據知煲呔當晚坐喺肥彭隔籬，成晚同肥彭密密斟。陳太透露，其實煲呔平日經常出席前行政局嘅定期聚會，同大家有傾有講，強調自己不時都有開解煲呔，「無論邊個人，經歷成三年幾調查，仲要等多一年先開審，之後仲唔知幾耐先審完，精神上嘅壓力好大」。陳太仲話呀，煲呔最近開始寫報章專欄，主要係想講番自己以前嘅政績，佢都有捧場做讀者㗎！
除咗敍舊，陳太最近又接受兩位法國人訪問，原來呢兩位法國人好有心，來港自資出版一本叫《Those Who Inspire》嘅書，訪問咗60幾位對港人有啟發性嘅港人，其中一個就係有香港良心之稱嘅陳太嘞！
陳太話本書賣成700蚊一本，因為兩位作者希望藉此集資，未來可以將本書免費派畀全港中學生。八方有幸先睹為快，發現訪問咗唔少政界名人，仲有一張陳太至愛嘅相，佢話係當年做政務司司長時英文報章幫佢影嘅後生相，佢亦準備咗一本，會送畀孫仔做聖誕禮物。
李八方
mailto:[email protected]