今季被曼城外借去意甲拖連奴嘅赫特，睇嚟同佢東家八字唔夾，早排曼城下滑，拖連奴就越戰越勇，到最近曼城好番，赫特嘅拖連奴就陷低潮。周日意甲拖連奴作客拿玻里，赫特由13分鐘起九分鐘內被對手前鋒梅頓斯連入三球，到最後以3:5慘敗，連輸三場加埋失咗10球。場波梅頓斯喺下半場入多粒，食大四喜之餘，亦係自74年後首位球員喺意甲連續兩場至少入三球。