仲記得喺今個夏季轉會窗關閉前，意大利前鋒「巴神」巴洛迪利由利物浦免費轉會法甲嘅尼斯，好多人都唔多睇好佢；不過，巴神今次轉會之後真係洗心革面喇，喺尼斯表現突出，日前尼斯迎戰迪安嘅聯賽又梅開二度，協助球隊以2:1勝出，喺榜首領先次席嘅摩納哥四分，又多第三位、衞冕嘅巴黎聖日耳門七分。賽後巴神仲同隊友一齊戴住聖誕帽，同球迷一齊預早慶祝聖誕㖭！