【三個粉絲追韓劇】嚟到2016年尾，各大頒獎典禮都搞得如火如荼，我哋《三個粉絲追韓劇》都搞返個「自己韓劇自己頒獎典禮」，由劇迷齊齊普選出各大獎項花落誰家！
今年多套韓劇嘅男主角都非常「養眼」，總有啲情節畀佢哋騷肌，包括《太陽的後裔》宋仲基半裸做gym，《任意依戀》金宇彬出浴，仲有《回來吧大叔》Rain幾乎全裸欣賞自己嘅body，睇到劇迷紅都面晒。當中金宇彬嘅body最吸精，不但女生投佢一票，連韓男Chon Jae Jun都大讚話，「一睇就知成日做運動，線條出晒嚟！」抵金宇彬獲得「最爆肌獎」！
韓劇男主角通常都係暖男，咁先迷倒一眾師奶少女，令巴打們葡萄，所以我哋特設「最佳暖男獎」。港女黎小姐就大讚《太陽的後裔》嘅宋仲基暖到爆，一改軍人冷血形象，而Tiffany就覺得《W-兩個世界》中，李鍾碩主動睇漫畫書學習點拍拖，非常warm！不過韓女就話《雲畫的月光》嘅朴寶劍最暖，Kim Song Ei畀晒like嘅手勢話，「梗係朴寶劍啦！」問到如果男朋友都好似劇中朴寶劍孭金裕貞咁孭佢，佢又like唔like呢？Kim Song Ei擰晒頭咁笑住話：「個樣都唔同！」
講到《雲畫的月光》，朴寶劍未知金裕貞係女人嘅時候已經愛上佢，原本應該頒埋「最佳基基獎」畀佢哋，點知最近殺出《鬼怪》，孔劉同李東旭兩個大男人同居，連外國媒體都大讚呢對「男男CP」有魅力，所以「最佳基基獎」梗係頒畀佢哋啦！
至於女主角方面，今年朴信惠少有地演打女角色，「最打得獎」非佢莫屬！此外，多位女星今年都挑戰做醜女，好似《請回答1988》嘅惠利、《她很漂亮》嘅黃靜恩同《又，吳海英》嘅徐玄振都喺劇中被公認「醜」！韓男Chon Kwang Jin話對惠利嘅印象最深刻，平時見佢做歌手有樣有身材，點知喺劇中化80年代嘅妝，真係醜到爆！不過，更多人認為黃靜恩嘅形象更醜，臉上嘅雀斑加爆炸頭無得輸，所以「最佳醜小鴨獎」由黃靜恩奪得。為女主角而設嘅仲有「最差酒量獎」，宋慧喬高票當選，劇迷都大讚佢醉得嚟非常可愛。
除咗一眾主角，每套劇嘅配角都非常重要，好似《請回答1988》嘅李東輝就被劇迷頒發「最老套獎」，港男Chin Ting話佢，「啲衫着到九唔搭八！」仲有自動得獎嘅波樂樂，呢隻英國古代牧羊犬喺《任意依戀》飾演金宇彬嘅愛犬，可愛到搶埋金宇彬fo，「最佳寵物獎」佢實至名歸啦！
至於2016年終極大獎「最受歡迎韓劇」係邊套？即刻去片！
主持：動主播阿仙、viu韓劇導賞員Ruby和阿愁
記者及繙譯：卓惠媛(Joyce)
攝影：陳家文、李錦鏵
以上韓劇片段由Viu提供：
https://goo.gl/Kyr3E6
【三個粉絲追韓劇】
http://hk.apple.nextmedia.com/enews/animation/kfans/