玩具反斗城嘅吉祥物長頸鹿Geoffrey噚日到訪《蘋果》，仲帶咗一隻蛋做手信。乜只係帶隻蛋做見面禮咁孤寒？原來呢隻唔係普通嘅蛋，而係Hatchimals Egg，正喺美國熱賣，香港早前入咗貨，但好快賣斷市，據聞反斗城喺周末一日可以賣成500至600隻。
查實蛋裏面有隻動物毛公仔，但小朋友要先孵蛋，包括撫摸吓隻蛋、輕敲蛋殼、聽吓蛋內動物反應或心跳聲，要好有心機兼耐性，八方都試過，不斷用手搓搓搓，搓到成頭大汗，隻蛋突然啪啪聲，有隻雀咁嘅動物用嘴啄爛咗個蛋殼，佢仲會自己唱生日歌，雙眼則會依照健康狀況同心情呈現唔同顏色，例如紅色代表唔開心、綠色代表生病，小朋友就要細心照料，好似那些年嘅電子寵物他媽哥池。