6個交易日內，有3日跌股數目超過千隻，市寬差到絕，買股命中率亦未免太低，難怪個個都話收爐。周一連加息輕傷者洛鉬（3993）都要隊埋一份，殼股又要調整，除咗中石油（857）同油服股之外，基本上冇股能夠升，全面下跌嘅覆蓋率，猶如跌500、600點嘅大跌市，的確非常差勁，盲目撈底冇着數。唯一等待入市訊號就係技術嚴重超賣，目前恒指9天RSI 23.8，算低但未跌到底部，可以繼續觀望一下。
下一次機會，應該來自出年2月1日美國公佈下一次議息結果之前。聯儲局似乎未必急進地喺來年第一次議息就加息，唔加的話，正路對市況有刺激，即使到時加息，相信市場會認為不明朗因素被掃除，令2017年其餘時間再加息壓力減輕。講到底，重點係咁差嘅市場氣氛之下，好大機會將息口敏感股同人民幣貶值受害者沽過龍。如果過份反映息口因素，嚴重超賣過後自然有機會掉頭反彈。
至於中國國債急跌？就算呢一刻流動性危機已經出現，講緊呢一篇稿執筆時係12月19日，中央要摸底並擺平事件，往績顯示三幾星期綽綽有餘，呢個因素加深港股短期跌勢，更易造就1月反彈市出現，反彈浪展開時間不詳，但相信完結時間會直至2月初議息結果出爐為止。而由呢一刻去到2月初公佈議息結果後，小弟相信大市係升的。
晉佳
http://fb.com/advanceguy1