禮拜日場西甲，巴塞主場4:1大勝愛斯賓奴，揚威打吡戰！呢場美斯真係屈機，兩分鐘內兩次連扭幾個，幫隊友製造兩個入波。18分鐘，蘇亞雷斯接應恩尼斯達長傳開紀錄，之後去到67分鐘，就到美斯表演嘅兩分鐘。佢喺禁區頂帶波推過三個，之後喺兩人夾擊之中突入禁區，再扣過一個，喺對手四人包抄前起腳，被客軍門將迪亞高洛迪古斯撲出，阿蘇補射成2:0。
阿蘇：打機咁樣
68分鐘，美斯又嚟過，禁區頂加速，愛奴諗住搵兩個守將閂閘，但都被美斯過咗。愛軍再搵多兩個人落地鏟，叫做令美斯失平衡，但個波就落咗喺無人看管嘅佐迪艾巴腳下，射成3:0。雖然愛奴其後破蛋，但美斯完場前輕鬆整多粒，幫巴塞贏夠4:1。阿蘇賽後諗起2:0嘅入波話：「我寧願美斯入呢球，佢之前嘅盤扭實在不可思議，就好似打機咁樣。」
