八方相當年：
鄧家彪因林鄭「德政」從政

跑馬仔行情越嚟越高漲嘅政務司司長林鄭月娥，曾經講過為官之途最愛嘅崗位係社會福利署署長，原來佢2000年至2003年擔任此職時，對工聯會立法會前議員鄧家彪好大影響，甚至係阿彪加入工聯會嘅推動力！
37歲嘅阿彪2001年中大社會科學院畢業，翌年加入社署保障部做就業支援主任，當年主要幫助失業綜援申請人搵工，因為呢個係時任署長林鄭大力推動嘅「自力更生支援計劃」目標，但越做越洩氣，指當時可獲嘅支援有限，「我點幫人搵到工？試過問當時嘅主管，佢只係叫我睇勞工處個網頁！」
監察申請人有冇搵工多過真係幫佢哋搵工，阿彪發覺唔對路，愛莫能助下意興闌珊，結果喺2003年入工聯會做政策研究，認為可以更貼地幫基層，相信佢都冇諗過，最終由研究變咗參選。

讀大學狂划艇操肌

想幫基層，可能同佢出身屯門屋邨，了解草根生活有關。阿彪透露初中時已經負責買餸兼煮埋，一家五口嘅廚師就係佢。向來讀文科嘅佢，預科畢業於迦密唐賓南紀念中學，佢話中學除咗打籃球，仲參加過即場演講比賽，「即係畀你抽一個題目，然後畀幾分鐘你任講，我係攞到獎㗎，搵嘢講原來唔係好難，哈哈」。
籃球健將入咗中大變成划艇好手，當時幾乎一星期操足6日，辛苦卻有收穫，至少當年都試過、大隻過。