紀惠集團行政總裁湯文亮博士變身「解辣大師」!事緣噚日佢出席美聯物業資訊中心開幕禮做嘉賓，臨出門嗰陣，秘書話想買樓，預算800萬元，佢就教秘書如何避辣稅嘞。
湯文亮教路，秘書同老公兩個人目標花800萬元買一層樓同一個車位，佢就建議倒不如分開兩注，用自己個名買層400萬元嘅樓，再用老公個名買個400萬元嘅車位，咁樣可以畀少好多稅。
究竟畀少幾多？假設秘書同老公係首次置業買家，去買層800萬元嘅樓，稅率3.75%，交稅30萬元。如果跟湯博士做法，分兩注，分別買400萬元樓同400萬元車位，稅率分別係2.25%同4.5%，合共交稅27萬元，比起以800萬元買一層樓，慳番3萬元稅款。
之但係，400萬同800萬樓，價錢差一大截，選擇範圍大不同，以十大屋苑為例，講緊係天水圍嘉湖山莊同太古城嘅分別。湯博士咁樣教人解辣，究竟贏到掌聲，還是換來大家「唓」一聲呢？