雖然同屬新民黨，但副主席田北辰向來被指同主席葉劉淑儀意見不合，甚至火星撞地球，但田二少上周喺葉劉嘅參選特首大會公開讚葉劉「坦率得可愛，堅持得可敬」，似乎想為不和闢謠，點知到咗呢個星期，二少又同葉劉唔啱key，大家話佢哋似拍檔定冤家？
話說扶貧委員會獨立顧問報告喺收到逾1.8萬份意見書中，逾九成支持不論貧富全民退保方案，身為委員嘅田二少噚日喺電台建議改善長者生活津貼方案，將資產審查由三級制變兩級制，即係廢除8萬蚊資產上限。
唔認同退保政綱
呢個建議同新民黨方案以至葉劉政綱都唔同，咁到底係咪挺葉劉㗎？二少強調兩級制方案唔代表黨立場，純因退保議題拖拉多年，呢幾個月一直反思，佢個人認為三級制太涼薄，所以先想改善方案。
咁「太涼薄」呢三粒字，係咪適用於提三級制嘅葉劉？二少解釋時都為葉劉講好說話，佢話葉劉係黨主席，如果為參選而提出同黨唔同嘅立場，就會被批評有選票考慮，所以有理由跟黨一貫立場嘅。
咁喺退保方案意見不合，會唔會影響對葉劉嘅支持？二少就話：「原則上道義上要支持佢……大家同一個黨，如果連我都出嚟話唔支持佢，唔係幾好。」二少唔認同葉劉部份政綱，但大部份都同意，亦唔相信任何候選人所有政綱都啱佢喎。
李八方
mailto:[email protected]