「又回到最初的起點，呆呆的站在第四前。」呢首網民改嘅阿仙奴版《那些年》真係應景。經過黑仔一星期後，阿仙奴由力迫車路士嘅爭標勁敵，回到去熟悉嘅聯賽第四。
佢哋禮拜日作客以1:2輸咗畀曼城，錄得兩連敗，但兩個失波其實都有越位之嫌，領隊雲格批評英足總過份保護球證。
連續兩場反勝為敗
阿仙奴呢場原本有個好開始，禾確特喺五分鐘就開紀錄，但換邊後冇耐就被追平。利萊辛尼接應大衛施華妙傳，半單刀追平1:1；辛尼其實有啲越位，但旁證睇唔到。71分鐘史達寧推大位，起左腳一射入網，雖然喺越位位置嘅施華喺門前行過，但球證覺得佢唔影響球賽，所以判入球有效，阿仙奴最後反輸1:2完場，聯賽兩連敗。
雲格賽後炮轟球證執法：「曼城兩個入波都越位，我實在太難接受呢個現實，特別係第二球，越成五碼咁多！不過，大家都知球證係受到保護，就好似動物園入面啲獅子咁，所以我哋要適應佢哋嘅決定。」不過，雲格呢場調動慢，到65分鐘先換阿歷士張伯倫入嚟，同埋死都唔換走踢到隱晒形嘅奧斯爾。張伯倫又係黑仔嘅，入替咗十幾分鐘就拉傷肌肉，未知要唞幾耐。
阿仙奴過去呢個星期真係傷，歐聯首名出線都要抽中對拜仁，咪話唔黑仔，上周中英超快車，前列球隊幾乎贏晒，係漏低阿仙奴；上周二嗰場兵工廠又喺領先1:0之下，以1:2不敵愛華頓。雲格話：「我哋經歷咗可怕嘅一周，真係好可怕。明明呢兩場波我哋係踢得較好，仲要入波先，但最後竟然一分都冇，令人好失望。」
列強齊贏熱刺窮追
未計周一場默西賽德打吡，喺呢輪英超，車路士、曼城、熱刺同曼聯都贏波，暫時係得兵工廠失分，其中同市宿敵熱刺周日以2:1主場反勝般尼，家陣追到只差阿仙奴一分。如果喺聖誕快車賽期仲唔反底，阿仙奴分分鐘連熟悉嘅第四位都不保。