以為隨着網媒社媒興起，新聞會趨向百花齊放，但Mary眼見卻非如此，反而議題越見單一集中，尤其最近，除了特首選戰，還只有特首選戰。
公關朋友的retainer客仔最近出了點事故，客仔憂心忡忡，怕被傳媒以調查式報道跟進，搞到朋友都神經兮兮，杯弓蛇影。Mary做到甩轆，但老友call到，總要借雙耳朵。
一聽之下，唔，確有些少麻煩，平常日子，被個別媒體大做，不是沒可能的，遂問老友，咁事故處理基本工夫，譬如形勢分析、按不同形勢做的幾套傳訊計劃和line to take、發言人培訓、事後補飛大計等，是不是都已做好？
老友話做就做晒，不過傳媒到時的反應則未知，所以未敢釋懷。哦，既然能做的已做盡，Mary一於膽博膽鼓勵老友：「冇有怕，信我，一定大步檻過！」「真係？」「唔……」Mary胸有成竹點點頭。朋友彷彿也就安心了不少。
幾日後又食飯，老友笑番晒，話報道比想像中溫和，客仔收晒貨。佢才忽然問：「你點估到㗎？」Mary 哈哈大笑：「其實唔知㗎，不過能做的都已做了，公關亦非神奇女俠，唔會次次都救到的，只要盡了力，就問心無愧，有乜好擔心先？」
Mary當然唔會咁不負責任，事實是當今單一大事乃選戰，不止冇人有資源掘這類marginal case古仔，就算報了，全城焦點都不在那裏，邊有人睇到吖，睇到第二日都唔記得啦！
所以，工作要照做，而且要做得專業，結果如何，就且別預支哀愁了。說到底，公司運作良好，就唔會有危機啦，咪當我哋萬能至得㗎！
彭瑪莉
mailto:[email protected]