牛扒？鵝肝？定係朱古力？民建聯陳克勤喺facebook貼咗張相，話自己收到一份聖誕禮物（圖），啡色嘅心形物體到底係乜？佢話估中可以請大家食。相信聰明嘅讀者都估到有景轟，冇錯陳克勤賣大包想益街坊嘅嘢，其實係一pat屎，你冇聽錯，確實係一pat牛屎，佢話自己都係第一次收到100%用屎製作嘅禮物喎。
邊個送禮者咁有心思，知道收禮人好啱呢pat屎？咦，西貢護牛天使會日前喺聖誕賣物會有人手製作過呢種天然牛屎餅，畀調理農務嘅人用。原來自從本地牛退役唔再耕作，呢班牛牛就「轉行」，為盆栽提供最天然嘅肥料，據聞呢個心形牛屎約值40蚊，咁就唔使申報嘞。