衞冕嘅李斯特城喺上周六作客史篤城嘅英超，仍然無法取得打開今季客場聯賽勝利之門，不過，佢哋喺落後兩球兼有前鋒華Dee（占美華迪）被逐嘅劣勢下可以追平2:2，相信球迷都收貨。如果李城唔同華Dee上訴，佢就要停賽三場，咁樣最開心嘅可能係佢太太碧琪，因為碧琪同華Dee嘅愛情結晶品就嚟出世，預產期係元旦。如果華Dee停賽，就會有多啲時間伴老婆同湊仔囉。
講番場波，華Dee喺28分鐘被球證包臣指雙腳飛鏟馬美迪奧夫而領紅，但慢鏡顯示判決有爭議，皆因華Dee出腳時確實係踢中皮球，搞到連一向脾氣好嘅李城領隊雲尼亞里，亦忍唔住要跟包臣對質，賽後雲尼亞里亦表明可能會替華Dee呢面紅牌上訴。
李城開Party唔見雲帥
包臣喺近兩場執法嘅英超聯賽都錯漏百出，連老牌球證韋比亦呼籲有關方面唔好畀包臣執法除夕夜利物浦鬥曼城呢場大戰，韋比話：「球證犯錯，就要付出代價，我認為包臣唔應該喺利物浦對曼城嘅大除夕賽事中執法。」包臣除咗喺李城呢場波犯錯之外，喺前一場曼聯勝水晶宮一役中亦表現麻麻，最離譜係冇將雙腳飛鏟韋費特沙夏嘅紅魔後衞馬高斯盧祖趕出場。
雖然領紅兼且球隊未能全取三分，不過，華Dee同一班李城隊友好似門將卡斯柏舒米高、飲水哥真禾特及中場馬列斯等，喺賽後就一齊去happy。不過，唯獨雲尼亞里就唔見人，唔知係唔係仲對包臣嘅執法嬲嬲豬呢？