這天禮拜日晨課場面冷清清，但仍有個別練馬師非常積極，姚本輝便是其中之一，一早到場督操，其中最緊張是「開心有你」，該駒由助手跳兩段，姚本輝一直在烽火台用望遠鏡凝神貫注，吼實馬兒的走勢，有晒搏殺手影。而晨操專家積奇則指「開心有你」緊韁下躍躍欲奔，翻步急勁，馬身脹卜卜，毛色深潤悅目，狀態保持大勇。
「開心有你」將角逐周四(22日)快活谷夜馬三班1200米，此駒今季大熟大勇，6戰得2冠1亞2季，上仗用連達文於同程大勝對手，看走勢評分仍有餘未盡，但連達文已回歸澳洲，據知「開心有你」將重配騎兩次得1亞1季的蔣嘉琦操刀。另外有項數據大家可以留意，原來姚本輝同嘉琦今季於谷草合作5次得3冠1亞1季佳績，上名率高達100%，所以「開心有你」真係唔好睇低。