型佬方中信08年「失驚無神」做老竇，原來佢老婆大人莫可欣懷孕三個月先同佢講。有指當時方中信同記者講﹕「我都唔係早你好多知咋﹗」最後莫可欣臨盆前兩日，正式同方中信註冊結婚。之後佢哋就同囡囡符迦晴一家三口，快快樂樂咁生活。
咁臨急做人老竇嘅方中信，佢又會有乜嘢教女心得呢！
當年迦晴只有19個月大嘅時候，方中信接受傳媒訪問，講到老婆莫可欣提議俾個女學彈琴，但方中信即刻阻止，「學琴咁老套，個個女仔都話畀佢學琴，應該畀佢跟我學風帆同電單車要有型」，方中信咁豪氣話要俾個女學風帆同電單車，但係呢啲興趣對入學攞分冇幫助，方中信好勞氣咁話：「唔可以淨係為入學，求學唔係求分數。」
唔做怪獸家長嘅方中信，之後轉戰大陸，只會久唔久喺香港拍吓大台劇，佢就曾經接受周刊訪問，好酸溜溜話唔覺妻女好掛住佢，仲好葡萄咁話，覺得自己唔喺香港嗰陣，老婆莫可欣同迦晴會自由好多，好多節目咁，一陣去行吓街，一陣又話去學騎馬，而佢就一支公咁喺大陸工作。
而方中信呢個教女方法都work嘅!囡囡迦晴同莫可欣出席活動時，媽媽莫可欣就透露話阿女好生性咁話自己想做獸醫，仲對畫畫好有天份o添！