新一屆議會有位飛機師公民黨譚文豪，果然零舍不同，之前民航處新空管系統啟用後事故頻生，呢位喺航空業打滾過一段日子嘅飛機師都即時回應，促請當局改善以保障市民安全。
左報似乎唔抵得譚文豪頻頻出鏡，日前《大公報》社評批評譚文豪識少少扮代表，對香港機場形象帶來負面影響。譚文豪就喺facebook回應，質疑「點為之空管專家？」佢話操作空管系統嘅空管人員因為日日有虛報鬼機、資料消失而要分心分析，壓力大增，兼且負上「航空安全最後防線」重任，受盡壓力又投訴無門，即使唔係議員、機師，都會為空管人員抱不平啦。佢質疑「喺香港人生命同航空安全之前，聲譽有咩重要？」仲要寸爆hashtag #多謝黨報睇得起。