阿爺繼續未批辭職唔放行，財爺曾俊華肯定等到好心急，點估到奶媽林鄭月娥後發先至，本周已經有得訪京「接旨」，為跑馬仔賽事帶嚟一啲啟示。據聞唔少本地左派趁落區或出席活動做民調，睇吓支持者至like邊隻馬仔，非正式統計結果係林鄭力壓曾俊華，唔知支持者嘅傾向會唔會轉化成選票？
嫌鬍鬚曾親工商界
八方聽聞唔少建制「紅」人見跑馬仔賽事越嚟越熱，紛紛趁落區或出席活動時做民調；去得愛國愛港陣營活動，在場人士當然「紅」心壯志，據聞結果幾一面倒，林鄭以大熱姿態跑出，大多讚佢夠硬淨、肯為基層云云。聽聞呢班基層紅人對新民黨葉劉淑儀反應麻麻，可能畀人感覺太精英，唔傾向普羅市民。至於民望極高嘅鬍鬚曾，據知喺紅色陣營冇乜支持，可能同佢背景洋化、形象親工商界同中產有關。
八方問過左派有票人士，雖則個個都話要睇定啲，但查實若然要揀，鬍鬚曾似乎唔係嗰杯茶，「罪狀」嚟嚟去去係質疑佢嘅愛國立場、太親民主派等，仲話阿爺疑似未開燈，好有可疑喎！
呢場變相係土共對工商界嘅跑馬仔賽事，最終誰勝誰負？