皇馬可以齊齊整整11個人踢晒成場決賽，真係大話夾好彩，事關隊長沙治奧拉莫斯（左二）喺完場前有機會領第二面黃牌，但球證竟然彈弓手救佢一命。踢到89分鐘，鹿角本來可以發動反擊，點知拉莫斯從後撞低咗準備引球出擊嘅金崎夢生，當時贊比亞球證施卡斯韋已經走埋去摷吓個衫袋，個勢似足係拎張黃牌出嚟，點知諗咗陣之後冇行動，激死班鹿角球員。