香港會計師公會剛選出新一屆理事同正副會長，新會長陳美寶係致同（香港）會計師事務所副管理合夥人；而今屆比較特別嘅，係龔耀輝舊年底話做咗10年公會理事，夠晒皮唔再重選，點知事隔一年，捲土重來又做番理事。
聞說龔耀輝舊年底忽然唔玩，係因為前一年佢同何超平爭做公會會長，爭輸咗，所以意興闌珊，不過佢早排已經積極參選做特首選委，兼且贏出，如今再下一城，睇嚟佢戰意番晒嚟，明年底公會再召開周年大會，佢應該好有興趣再爭做會長。
不過，會計師公會會長係由理事之間互選，唔係由4萬名會員選出（會員選出理事，再由理事選會長），如果制度不變，龔耀輝又無法得到多數理事支持，佢都幾難做得成會長。