今年嘅政壇真係俾青年新政游蕙禎獨領風騷,由當選到被DQ,一直都係網民熱話,佢升呢做議員後講嘢都好坦白,有次出席論壇時語出驚人,講開土地不足時就舉例話:「就算我哋要扑嘢,都搵唔到房去扑!」令冇房扑嘢成為一時佳話,更成為今年雅虎香港10大熱搜神級理論第一位,當中七成搜尋扑嘢論嘅網民係男性,估唔到真係咁多人關心住屋問題喎!
鄺體逗號多人關注
而被中央DQ咗嘅特首梁振英,今年都惹起唔少熱話,年初佢建議喺中環設立泳棚,上班族午飯後可以游水20分鐘,即刻惹嚟大批網民鬧佢離地,皆因食飯都未必夠時間,仲邊度有時間去游水呢?結果689嘅午飯游水論排第二位,而搜尋者中又以80及90後網民最關注!
翠如BB發表過嘅好驚人講粗口言論排第三,力壓屯門媽媽喺無綫節目中話要計好嬰兒出生日期「贏在射精前」嘅言論。喺立法會超級區議會選舉狂吸49萬票成為票王嘅白鴿黨立法會議員鄺俊宇,創作出「逗號很累,但逗號不說」嘅鄺體,唔少網民搜尋佢嘅逗號,唔通想做翻版大文豪?
排之後嘅就係吳亮星就李波事件發表嘅洗頭艇論,相信大家至今記憶猶新。忽然選特首嘅退休法官胡國興憑住一句「佔中好玩論」排第7,力壓傑青黃仰芳嘅買樓論、立法會前議員何秀蘭回應游BB嘅長髮唔環保論以及梁唐青儀嘅喺屋企種菜論。唔知明年今日嘅新特首,會唔會有更語出驚人嘅偉論上榜?
李八方
mailto:[email protected]