英國喺里約奧運表現搶眼，多間英媒近日就大爆，今屆奧運夾埋贏到五金嘅積遜堅尼（右）同卓爾（左），會齊齊出現喺元旦授勳嘅名單上。雖然呢對喺奧運後拉埋天窗嘅單車情侶已經攞過大英帝國官佐勳章（OBE） ，但有消息話兩人會獲皇室冊封騎士爵位，以表揚佢哋嘅成就。據悉呢次元旦授勳名單上有多位運動員，網球一哥梅禮同里奧贏到兩金嘅長跑選手法拉都有份。