周日喺杜拜舉行嘅國際羽毛球超級系列賽總決賽，中華台北「一姐」戴資穎喺女單決賽只係用咗37分鐘，就以直落兩局擊敗南韓球手成池鉉，職業生涯第二次喺年終賽稱后。
戴資穎開局盡顯爭勝心，先以21:14拔頭籌，呢位22歲一姐喺第二局延續強勢，逼得成池鉉多次出錯，最終贏埋21:13，攞到佢上月底喺香港公開賽封后兼登上世界第一後，首個以一姐身份贏嘅冠軍。值得留意嘅係，戴資穎2014年喺年終賽稱后嗰陣，都係擊敗呢位世界排名第五嘅南韓球手㗎。
丹麥球手艾素臣就喺同日男單決賽，以局數2:1擊敗中國嘅田厚威，職業生涯首次喺年終賽封王，22歲嘅佢賽後顯得相當興奮，仲話要多謝球迷不斷幫自己打氣喎。至於中國隊就以19歲新星陳清晨最威，喺女雙同混雙決賽先後夥拍賈一凡同鄭思維連下兩城。