商台主辦的「2016年度叱咤樂壇流行榜頒獎典禮」將於元旦舉行，日前商台公佈我最喜愛的女歌手入圍名單，出道8年的鄭欣宜和出道14年的方皓玟首度打入5強，越級挑戰天后容祖兒、謝安琪（Kay）和何韻詩爭獎，由於人妻Kay現大肚停工，祖兒又不是叱咤聽眾杯茶，令今年憑《女神》唱紅的欣宜，大有機會開齋攞獎。
「開心到爆喊」
欣宜昨日在溫哥華出席岑麗香的婚禮，她前日接受本報電話訪問時坦言興奮：「嘩！簡直係開心到爆喊咗，因為呢排拍電視劇時間比較長，又要keep住做音樂嘅嘢，嗰日我拍完二十幾個鐘頭，但之前嗰晚只係瞓咗兩個鐘，再之前嗰日拍咗十幾個鐘。到我起身就係聽到粉絲send咗謝茜嘉喺電台宣佈5強，我唔明發生乜嘢事囉。」
當知道自己入5強，欣宜開心到癲了：「我嘅反應係吓！跟住就見到有好多WhatsApp，朋友同我講恭喜，跟住我就爆喊咗，係囉，黐線㗎！我估都估唔到會發生咁嘅事，真係我覺得已經贏咗囉，仲要另外嗰幾位都係我自己好欣賞嘅歌手，我係癲咗嘅，亦都多謝投我票嘅每一位，真係每一票都喺度改變咗我命運。」
方皓玟平常心
至於同樣首次打入5強的方皓玟，就以平常心面對獎項：「因為我最想睇見嘅結果，其實係香港嘅聽眾可以再次愛上香港音樂，每一位歌手都可以爭氣令到成個樂壇再次開心起嚟，或者係好似以前嘅樂壇一樣咁燦爛，我會繼續加油努力。」
採訪：皓騫