死過翻生，唔少人對人生會有新睇法，不過，對於前法國國腳真路拿嚟講，死過翻生並冇令佢更加珍惜身邊嘅人，反而俾咗佢藉口去搵小三！
「玩到盡」先對得住自己
年輕一輩嘅球迷可能唔知道真路拿係邊個，佢係前法國國腳翼鋒，同「曼聯足球王帝」簡東拿同代，曾效力熱刺及紐卡素等英格蘭頂級球隊，喺球員時代走長髮飄飄嘅靚仔路線，迷倒唔少女球迷㗎。
喺今年五月，49歲嘅真路拿喺一場足球慈善賽中心臟病發，仲有八分鐘處於「醫學死亡」（clinically dead）狀態，結果要用心臟起搏器電咗四次，之後做咗六粒鐘心冠狀動脈搭橋手術先至救得番，事後仲識講笑，喺twitter話唔應該咁猛太陽先嚟踢波。
死過翻生之後，真路拿唔係選擇更加注意健康，而係認為自己獲得一次重生機會，所以要「玩到盡」，唔肯戒煙之餘，竟然仲同細自己22年嘅小三美華打得火熱！
27歲嘅美華係法國模特兒兼演員，樣靚身材正，真路拿好鬼嗒佢糖，就算明知自己已經結咗婚兼有一對仔女，都完全唔避嫌，同美華喺大街攬攬錫錫。真路拿身邊嘅人話：「經過上次死過翻生咁恐怖嘅經歷之後，真路拿唔會再理人地點諗或者點睇自己，認為一定要玩到盡先對得住自己，一切都要依自己嘅心意去做。」
正印心傷回復娘家姓
真路拿咁做，佢嘅正印太太嘉露蓮唔嬲唔傷心就假，據悉，48歲嘅嘉露蓮曾經叫過美華唔好搞自己個老公，不過見到真路拿個心都唔係自己度，所以佢最近已經冇再用真路拿呢個姓氏，用番自己娘家個姓。
雖然表面上真路拿好似因為今次死過翻生事件而性情大變，不過，我求大俠翻查資料，就發現佢早有前科，喺1991年同嘉露蓮準備結婚前，就搭上咗模特兒祖兒，祖兒仲同佢生咗私生女頌伊，所以真路拿要畀贍養費祖兒兩母女；而喺真路拿出事之後，頌伊仲專程到醫院探佢，但就慘食閉門羮，認真無情。所以，真路拿講乜嘢因為死過翻生而有新睇法都係假，我求大俠就覺得佢搵藉口偷食就真。