腳趾食提子接新娘

岑麗香昨日與圈外男友強強在溫哥華結婚，兩人雖然在外國長大，但婚禮就依足傳統，一對新人換上中式禮服向父母斟茶。愛簡約的新娘子香香，穿上裙褂時，兩手亦只各戴一隻金𠼦，髮髻繫上大朵紅花做頭飾，頸上掛的金豬頸鏈也是的骰款不浮誇，有別其他新娘子成身金器。兩人見傳媒時一直十指緊扣，又應要求咀嘴，非常甜蜜。

講到接新娘情況，香香說：「辛苦佢哋7個男仔，答好高難度問題，好大犧牲，爭啲嘴對嘴，我喺後面睇，佢哋仲要用腳趾食提子。」身邊強強即插嘴：「唔係我哋，係辛苦我呀！」問有埋怨老婆嗎？強強說：「都唔會呀！」未知是否香香聽錯「都會」，令現場氣氛停頓3秒，香香都來不及反應，她其後「吓」了一聲，場面爆笑。強強自爆接新娘時有壓力，可能太心急，他廣東話又不流利。