今次沙田日馬重頭戲係第八場二班1000米六福珠寶盃，贊助商同馬會搵咗一批藝人入場表演同頒獎助興，結果呢場直路賽頭馬，咁啱亦同明星有關。由宇宙最強甄子丹與老襟蔡加讚合夥擁有的大摩馬房「宇宙車神」，今場在復出騎師祈普敦胯下12檔起步，貼住外欄以高速一放而回，2.5倍大熱贏馬，打開今季勝門，組合獨贏A1派13元。
甄子丹有新戲《星球大戰外傳：俠盜一號》上畫，飾演Chirrut Imwe一角，要做宣傳唔得閒入場，但未有影響愛駒表現，「宇宙車神」負133頂磅下，仍一放到底大勝近三馬位，盡露超級本色，馬兒今場獲約100萬獎金，在港已累積三捷。甄子丹雖不在場，但太太汪詩詩、妹妹汪圓圓及其丈夫蔡加讚有拉頭馬，並由嘉賓林峯頒獎，仍算星光熠熠。
「宇宙車神」練馬師大摩已經連續五次沙田日賽贏馬未斷纜，直迫同類賽日八連勝的另一個阿John蔡約翰。而祈普敦這天停賽期滿復出，一直表現麻麻，直到六福珠寶盃才嚟料捧盃，賽後梗係要多謝鄉里大摩支持。
今場亞軍係「朋友仔」，季軍在港初出馬「最驫」，第四名「飛廉之子」，四重彩派一萬四千幾。