韓國女歌手IU去年來港開騷，完美演繹廣東歌《囍帖街》，獲全城激讚。前晚IU再度來港於香港會展舉行演唱會，又邀得陳奐仁做表演嘉賓。IU今次明顯苦練廣東話，在現場棄用繙譯，盡量以廣東話與粉絲交流，又再唱《囍帖街》及首度獻唱Beyond經典作《喜歡你》。
勁換四套衫
前晚IU開騷先後換了四套靚衫會港迷，全晚唱足20多首歌，更吸引本地藝人張致恆和「鴨王」何浩文（Dominic）捧場。IU以一襲紅色露肩超短裙現身，晒腿又唱又跳《Twenty Three》炒熱氣氛。唱完三首歌後，IU先用廣東話打招呼：「大家好，我係IU。」為了遷就歌迷，IU亦刻意慢慢講，又頻頻用廣東話問台下歌迷：「鍾唔鍾意（今日造型）呀？」、「我靚唔靚？」其後自彈自唱，兼獻唱兩首廣東歌《囍帖街》和《喜歡你》，完全冇睇貓紙，發音更非常標準。不過IU都大呻廣東話難學，直言是世界上最難的語言，又賣口乖說：「我廣東話唔好，點算？但見到大家嘅反應，幾辛苦都好值得。」
23歲呻老
而IU和陳奐仁就未有合唱，但IU就大讚睇完陳奐仁的演出之後心情超好。當演繹2009年舊歌《Marshmallow》時，23歲的IU就笑言：「首歌係高中時嘅，當時太可愛，𠵱家我已經有啲老。」
之後IU戴上聖誕帽頭飾唱歌，預早與港迷慶祝聖誕，又自爆提早一日來港已順道欣賞香港夜景，完騷後IU跟觀眾都勁依依不捨，最終IU先後安歌三次，更準備了長達逾分鐘的廣東話感謝短片。
採訪、攝影：梁展雯