女將蔣嘉琦升格由減七磅轉減五磅後，只贏過兩場，表現唔算突出。但這天沙田日馬跑到第五場四班1600米，卒之見番嘉琦BB的看家放馬本領，佢重新接手霍利時馬房「凱旋星光」一放到底，此駒初跑此程打開在港勝門，單Win及組合獨贏A3分別派97及33.5元。
「凱旋星光」之前在港18戰未勝，今次回配騎過一次得季軍的蔣嘉琦，馬兒演出大有進步，不過嘉琦BB呢場有瑕疵，「凱旋星光」直路越跑越外斜，但佢仲持續打右手鞭，是少數大外叠過終點的放頭馬，如果唔係座騎孭輕到111磅，隨時放唔到俾後上如箭的綠燈馬「王者再現」追過。
「王者再現」末段左插右穿走之字路，最終在柏寶胯下姍姍來遲做阿二，落飛黨賭重佢獨贏至6.1倍，輸到暈暈哋。三、四名分別為大熱門「美麗寶寶」及冷馬「星二快勝」，四重彩派三萬三千幾。
霍利時除了贏「凱旋星光」外，還有頭場與韋達合作勝出「勇晉神駒」，呢位南非籍練者跑完前五場，憑一對開齋馬今季首次於沙田日賽雙喜臨門，目前霍利時已有13Win，距16場頭馬達標已在望。