45歲老將韋達早前在澳洲一級賽疑似睇錯終點線位置，提早收步，搞到座騎僅輸少少屈居亞軍，韋達因此被重罰停賽1個月，他亦坦言自己在過去個幾星期，承受好大壓力。不過，韋達畢竟曾是十三屆香港冠軍騎師，又豈是浪得虛名。
這天沙田賽事韋達用行動證明自己並非老眼昏花，繼第一場贏霍利時馬房「勇晉神駒」後，第二場四班1000米直路賽韋達再下一城，策文家良馬房的初出馬「叫關健康」突圍，單Win及組合獨贏A1分別派62.5及18元正。韋達已連續兩戰起孖，明顯衰運已過，可惜今日賽後他將停賽1個月（7個本港賽日），下月18日才可復出。
3歲馬「叫關健康」今場服役首戰，藉直路賽有利之14檔，沿途前置，就此輕勝四分三馬位。此駒父系WRITTEN TYCOON子嗣如「一片光明」等在港成功率高，而「叫關健康」無論在新西蘭及在港試閘，同樣表現理想，估計有三班甚至二班爭勝實力，所以今仗在四班一出即勝其實並不意外。
今場二至四名順序「和平開心」、「新界之星」及「勁有波幅」，四重彩64,870元。