香港數碼廣播（DBC）喺10月終止廣播，行內人稱燦哥嘅羅燦（圖）亦無做DBC嘅行政總裁，行家都關注佢嘅去向，事關燦哥喺傳媒界工作超過30年，除咗做過《蘋果日報》社長，又做過《信報》、nowTV、有線電視同TVB等等，早前有傳佢會回歸電視媒體，噚日終於有答案。主要喺九巴經營巴士電視同車身廣告等生意嘅路訊通（888），委任燦哥做董事總經理兼執行董事，明年2月1日起生效。
路訊通今次都算誠意十足，先畀60萬簽約獎金，之後基本月薪20萬，仲有花紅，加埋做公司董事每年董事袍金都有11萬，出手算好闊綽。市場對燦哥加盟路訊通多少有啲意外，事關佢2005年起一直都係幫小小超手，𠵱家加盟新地（016）郭氏家族任大股東嘅路訊通，唔通郭氏想借助燦哥嘅經驗大搞傳媒業？